ÁZIA TENKI SERBISU HAMUTUK ATU JERE RISKU SIRA, HETAN BENEFÍSIU SIRA INTEGRASAUN NIAN

SINGAPURA (19 Jullu 2012) – Integrasaun bot liu lori benefísius maibé lori mos risku ne’ebe potensialmente bot tebe-tebes, ne’e dehan katak governu Àzia sira tenki serbisu hamutuk atu estabelese polítika no estrutura sira atu garante katak rejiaun ne’e minimiza risku sira ne’e no hetan benefísiu sira, dehan Banku Aziátiku ba Dezenvolvimentu (ADB) iha ni-nia Asian Economic Integration Monitor foun.

“Paízes Azia sira ne’ebe sei dezenvolve-an hela ni-nia kresimentu ekonómiku ne’ebe forte iha parte ida mosu tanba lasu ekonómiku no finanseiru ne’ebe aumenta iha rejiaun laran maibé integrasaun bot liu bele lori kontájiu no risku sira seluk no ita tenki trata ameasa sira ne’e liu husi kooperasaun estreitu liu,” dehan Iwan J. Azis, Xefe Gabinete Integrasaun Rejional ADB nian. “Ikus mai, integrasaun tenki hadia ema hotu-hotu nia padraun moris iha rejiaun laran.”

Integrasaun estreitu halais transmisaun krize iha paíz ida ba paíz seluk hanesan bele hare’e foin lalais ne’e iha Europa. Nune’e mos, integrasaun bot liu bele hasae deziguldades rendimentu nian iha nasaun sira laran maske nia diminui ona dezigualdades entre nasaun sira.

Ho integrasaun ne’ebe aumenta daudaun no estabelese ona atu kontinua iha Ázia, rejiaun ni-nia governu sira presiza koopera liu tan atu halakon risku sira ne’e, dehan relatóriu ne’e.

View infographic in higher resolution.

Atu kombate ameasa kontájiu ekonómiku ka finanseiru nian, Ázia tenki hametin rede seguransa sira hanesan akordus troka moeda ne’ebe estabelese ona iha ASEAN+3 no Ázia Sul. Rede seguransa sira ne’e tenki bot no fleksível natón atu lida ho krize sira iha loron aban-bainrua nian ne’ebe bele hadaet ho maneira oi-oin ba krize sira uluk, no sira presiza atu apoiadu ho mekanizmu kontrole efikáz ida.

Atu garante katak katak paízes hotu-hotu hetan benefísiu husi integrasaun estreitu liu ne’e, rejiaun tenki kria ligasaun transporte barak liu tan atu aumenta asesu ba merkadu trans-fronteirisu sira tanba rejiaun ni-nia infraestrutura orasne’e totalmente la-adekuadu. Permiti traballador sira movimenta livre liu tan mos tulun diminui diferensa rendimentu nian. Ázia mos presiza hadia ni-nia polítika, estrutura regulatória no institusional sira – hanesan prosedimentu komérsiu nian ne’ebe komplikadu ka aklarasan alfandegáriu ne’ebe difísil – atu impulsiona atividade intra-rejional.

Rejiaun ne’e iha ligasaun komérsiu partikularmente forte – iha fatin balun forte liu iha Europa – ne’ebe estabelese ona atu iha kresimentu tanba produtu rejional sira halo barak liu tan atu fa’an iha merkadu rejional sira em vez de merkadu sira iha Europa no EU ne’ebe sai kikoan tan.

Moeda Renminbi Repúblika Popular China nian orasne’e daudaun uza barak hodi selu transasaun komersial sira. Iha tempu laran, nia bele sai moeda referénsia ida, hodi tulun rejiaun atu integra sira-nia ekonomia sira, serbisu hamutuk iha kestaun monetáriu no finansas no mos loke merkadu finanseiru RPC nian neineik-neineik.

Integrasaun finanseira, maske aumenta, maibé sei ki’ik. Maske integrasaun estreitu liu aumenta risku kontájiu, maibé merkadu sira ne’ebe dezenvolvidu diak liu sei permiti atu investe poupansa lokal sira lokalmente em vez de haruka osa ne’e ba rejiaun liur. Ne’e bele tulun atu finansia infraestrutura iha rejiaun laran ne’ebe presiza tebe-tebes.

ADB, bazeadu iha Manila, dedika’an atu hakuran kiak iha Azia no Pasífiku liu husi kresimentu ekonómiku inkluzivu, kresimentu sustentável iha termus meiu ambiente no integrasaun rejional. ADB ne’ebe hari’i iha 1966, pretense ba membrus 67 – 48 husi rejiaun. Iha 2011, aprovasaun sira ADB nian inklui ko-finansiamentu hamutuk hotu $21.7 billoens.


ADB iha video ho rezolusaun a’as ba eventu novidade ne’e ba uzu nao-komersial gratis. Favor kontaktu: Alphonso Van Marsh  (Tel: +632-632-5840/5875. Mobile: +63-920-949-6388).

Partisipa iha bate-papo online ida ho Dr. Azis no ekonomista OREI Lei Lei Song iha 23 Jullu iha tuku 1400-1600 oras Manila. Asesa bate-papo ne’e no haruka pergunta sira antesipadamente iha ne’e.