ADB HO JICA HAMUTUK AJUDA TIMOR-LESTE PREPARA BA ADEZAUN ASEAN

DILI, TIMOR-LESTE (18 Outubru, 2013) – Ministru no ofisial sira husi governu, funsionáriu sira husi Banku Aziátiku ba Dezenvolvimentu (ADB), no reprezentativu sira husi Ajénsia Kooperasaun Internasionál Japaun (JICA) hasoru malu horisehik (17/10) hodi prioriza asaun balun atu prepara Timor-Leste nia adezaun ba Asosiasaun Nasoins Sudeste Aziátiku (ASEAN).

Timor-Leste hatama pedidu ba adezaun ASEAN iha fulan Marsu tinan 2011.

“ADB sente haksolok bele servisu ho JICA hodi apoia Governu Timor-Leste nia esforsu atu hametin ligasaun ekonómika ho Ázia,” tenik Shane Rosenthal, Reprezentante Rezidente ba ADB nia Misaun Rezidente Timor-Leste.

ADB no Governu Timor-Leste koopera atu prepara nasaun ida-ne’e hodi hetan benefísiu husi ligasaun ekonómika ne’ebé metin ho Sudeste Aziátiku liuhusi inisiativa asisténsia téknika ida. ADB nia apoiu sei ajuda Timor-Leste kria ka haloos lejizlasaun atu nune’e bele kumpre ASEAN nia rekizitu sira, prevee no planeia ba oportunidade ekonómika no dezafiu hirak ne’ebé kauza husi adezaun ba ASEAN.

Workshop horisehik ne’e organiza husi Ministériu Negósiu Estranjeiru no Kooperasaun Timor-Leste nian ho apoiu husi ADB.

Durante workshop ne’e, interesadu sira planeia pasu asaun prioritária atu responde ba dezafiu husi Timor-Leste nia kapasidade relasiona ho adezaun no integrasaun ba ASEAN.

ADB nia kuadru estratéjiku longuprazu, Estratéjia 2020, tau kooperasaun no integrasaun rejionál nu’udar área prinsipál ida husi área prinsipál lima hodi alkansa nia misaun atu redús pobreza iha Ázia no Pasifika. ADB integra kooperasaun no integrasaun rejionál ba iha operasaun hotu-hotu atu ajuda dezenvolve nasaun membru sira enfrenta dezafiu no oportunidade rejionál liuhusi asaun koletiva ida.