SEKSAUN ESTRADA LIQUICA-MAUBARA RAMATA ONA IHA PROJETU ESTRADA TIMOR-LESTE

LIQUICA, TIMOR-LESTE (5 Fevreiru 2014) – Seremonia espesial ida halao tiha ohin atu loke ofisialmente seksaun estrada Liquica-Maubara ne’ebe foin lalais ne’e ramata iha Projetu Setor Dezenvolvimentu Rede Estrada, ne’ebe selu ho subvensaun ida husi Banku Dezenvolvimentu Azia (BDA).

Projetu ne’e reabilita ona estrada nasional kilómetru 16, halo ona programa manutensaun estrada ida, no sei moderniza 60 kilometrus estrada nasional sira bainhira ramata ona iha final 2015.
 
Fernando Lasama de Araujo, Vise Primeiru Ministru Timor-Leste, lidera delegasaun abertura estrada ne’e iha seremónia ida hamutuk ho Ministro das  Obras Públicas, Gastao de Sousa, no Shane Rosenthal, Reprezentante Rezidente husi BDA ni-nia Misaun Rezidente Timor-Leste (TLRM).
 
 “Alein de hametin konetividade, seksaun Estrada ne’ebe hadia ona ne’e sei halais oportunidade ekonómika, promove kresimentu setor privadu, hasae produtividade agríkola, no hakuran kiak,” Sr. Rosenthal dehan. “Estrada ne’ebe bele konfia liu no seguru liu ne’e tenki hasae tráfiku pasajeiru no naha no mos hakuran tempu viajen nian.”
 
Elementu prinsipal ida projetu estrada ne’e nian mak ni-nia dezenhu rezistente hasoru klima signifika estrada ne’ebe moderniza ona ne’e sei menus vulnerável ba inundasaun no rai-monu. Melloria estrada entre Dili no fronteira sei aumenta ligasaun ho Indonezia, nudar Timor-Leste ni-nia fonte importasaun prinsipal no terseiru merkadu exportasaun bot liu.
 
Projetu ne’e la’os deit suporta reabilitasaun estrada, maibé tulun mos governu atu hari’i sistema no prátika sira ba manutensaun estrada. Ministério das Obras Públicas hein atu replika modelu sira ne’ebe halo ona iha projetu ne’e iha rejiaun sira seluk Timor-Leste nian. Fo ona treinamentu atu aumenta kapasidade kontratante nasional sira nian iha área teknolojia manutensaun estrada, aprovizionamentu, no jestaun projetu.