მანილა, ფილიპინები (21 სექტემბერი 2022) — განვითარებადი აზიის ეკონომიკების ოთხი მეხუთედი ციფრული გარემოს გლობალური ინდექსისა და მეწარმეობის ხელშემწყობი სისტემების სიის ბოლოს იკავებს ადგილს, აზიის განვითარების ბანკის (ADB) მიერ შემუშავებული ახალი ინდექსის მიხედვით.
სინგაპურს მეწარმეებისთვის მსოფლიოში საუკეთესო ციფრული გარემო და ხელშემწყობი სისტემები აქვს, ნათქვამია დღეს გამოცემულ ციფრული მეწარმეობის სისტემების გლობალურ ინდექსში, რომელიც აზიის განვითარების პროგნოზი 2022-ის განახლების ფარგლებში გამოვიდა. სიაში შეყვანილი 113 ეკონომიკიდან მეორე ადგილზე შეერთებული შტატებია, მესამეზე კი შვედეთი. შეფასების მიხედვით, განვითარებადი აზიის 21 ეკონომიკიდან 17 სიის ბოლოსაა განთავსებული, რაც ხაზს უსვამს ბევრ მათგანში ციფრული მეწარმეობის ხელშეწყობის აუცილებლობას.
გაციფრულება აზიისა და წყნარი ოკეანის რეგიონის ბიზნესებისთვის განვითარების დიდ შესაძლებლობას წარმოადგენს. ეს ინოვაციის მამოძრავებელი ძალაა, რასაც გადამწყვეტი მნიშვნელობა აქვს ეკონომიკებისთვის მაღალი შემოსავლის მქონე ეკონომიკის სტატუსის მისაღებად. მას ასევე შეუძლია ეკონომიკები გახადოს უფრო მედეგი, რაც კოვიდ-19-ის პანდემიის დროს გამოჩნდა, როცა მრავალი ბიზნესი ციფრული ტექნოლოგიების დახმარებით გადარჩა. მას ასევე შეუძლია ინკლუზიური ზრდის წახალისება ბიზნესის დაწყების ხარჯების შემცირებით.
„ციფრული მეწარმეობა ეკონომიკებს კოვიდ-19-ის პანდემიის დროს მუშაობის გაგრძელებაში დაეხმარა და პანდემიის შემდგომ პერიოდში აქვს შესაძლებლობა გახდეს ზრდისა და ინოვაციის მთავარი მამოძრავებელი ძალა,“ განაცხადა ADB-ის მთავარმა ეკონომისტმა ალბერტ პარკმა. „ამისათვის საჭიროა ხელშემწყობი გარემოს შექმნა შესაბამისი პოლიტიკის გატარებითა და წახალისებით. მიუხედავად იმისა, რომ ბოლო ორ წელიწადში აზიის ციფრულმა მეწარმეებმა მნიშვნელოვან წინსვლას მიაღწიეს, გასაუმჯობესებელი კიდევ ბევრია.“
აღნიშნული ინდექსი აფასებს ციფრული მეწარმეობისთვის არსებული გარემოს ხარისხს გაციფრულების რვა მიმართულებით, როგორიცაა: კულტურა, ინსტიტუტები, ბაზრის მდგომარეობა, ადამიანური კაპიტალი, ცოდნა, ფინანსები და კავშირები.
ციფრულ ინფრასტრუქტურაში, მაგალითად, ფართოდიაპაზონიან ქსელებში ინვესტირების გარდა, მთავრობებს სჭირდებათ პოლიტიკური სტაბილურობის, სანდო სამართლებრივი სისტემების, ღია და კონკურენტუნარიანი ბაზრებისა და საკუთრების უფლების გაძლიერება. ADB-ის ანალიზი აჩვენებს, რომ კანონის უზენაესობას დადებითი გავლენა აქვს ინოვაციების განვითარებაზე, ხოლო საზოგადოებაში არსებული კორუფციის დაბალი დონე ხელს უწყობს ბაზარზე ახალი მეწარმეების გაჩენას.
საერთო ჯამში, ციფრული მეწარმეობის განვითარების კუთხით აზიისა და წყნარი ოკეანის რეგიონის ყველაზე დიდ სისუსტეს არასაკმარისი ხელშემწყობი კულტურა წარმოადგენს. ამის ერთი მაგალითია, ეკონომიკურ პროგრესში მეწარმეების სასიცოცხლოდ მნიშვნელოვანი როლის არასათანადო დაფასება საზოგადოების მხრიდან. ამ მდგომარეობის შეცვლის ერთ-ერთი გზა განათლების გზით მეწარმეების შესახებ საზოგადოებრივი აზრის გაუმჯობესებაა.
ADB-ის მიზანია, ხელი შეუწყოს აზიისა და წყნარი ოკეანის რეგიონის წარმატებულ, მრავალმხრივ, მედეგ და მდგრად განვითარებას. ამავდროულად, ის აგრძელებს მუშაობას რეგიონში უკიდურესი სიღარიბის აღმოსაფხვრელად. 1966 წელს დაარსებული ორგანიზაცია აერთიანებს 68 ქვეყანას, მათ შორის 49 აზიის რეგიონიდანაა წარმოდგენილი.
| Rank out of 113 global economies | Score (0-100) | |
| Singapore | 1 | 81.3 |
| United States | 2 | 79.7 |
| Sweden | 3 | 79.6 |
| Denmark | 4 | 78.8 |
| Switzerland | 5 | 76.9 |
| Netherlands | 6 | 75.6 |
| Finland | 7 | 73.3 |
| Norway | 8 | 69.9 |
| Luxembourg | 9 | 69.6 |
| United Kingdom | 10 | 69.0 |
| Republic of Korea | 22 | 54.1 |
| Malaysia | 27 | 43.1 |
| People's Republic of China | 39 | 35.3 |
| Georgia | 50 | 28.3 |
| Kazakhstan | 52 | 27.4 |
| Armenia | 58 | 26.0 |
| Thailand | 59 | 25.9 |
| Azerbaijan | 60 | 25.5 |
| Viet Nam | 63 | 23.1 |
| Indonesia | 71 | 20.4 |
| India | 75 | 19.6 |
| Philippines | 79 | 18.5 |
| Sri Lanka | 82 | 17.5 |
| Mongolia | 84 | 17.2 |
| Kyrgyz Republic | 88 | 15.2 |
| Tajikistan | 95 | 12.8 |
| Bangladesh | 96 | 12.5 |
| Pakistan | 97 | 12.3 |
| Cambodia | 101 | 12.0 |
| Nepal | 104 | 11.5 |
