ទីក្រុងម៉ានីល ប្រទេសហ្វីលីពីន (ថ្ងៃទី ២១ ខែកក្កដា ឆ្នាំ ២០២២)៖ ធនាគារអភិវឌ្ឍន៍អាស៊ី (ADB) បានបន្ទាបការព្យាករកំណើនសេដ្ឋកិច្ចរបស់ខ្លួនសម្រាប់តំបន់អាស៊ីនិងប៉ាស៊ីហ្វិកកំពុងអភិវឌ្ឍ មក​ត្រឹម ៤,៦% នៅឆ្នាំនេះ ដោយសារកំណើនថយចុះក្នុងសាធារណៈរដ្ឋប្រជាមានិតចិន (PRC) ការរឹតបន្តឹង​រូបិយវត្ថុកាន់តែខ្លាំង ក្នុងប្រទេសដែលមានសេដ្ឋកិច្ចជឿនលឿន និងផលវិបាកដែលបណ្តាលមកពីការ​អូស​បន្លាយនៃសង្គ្រាមរវាងរុស្ស៊ីនិងអ៊ុយក្រែន។

ទស្សនវិស័យនេះប្រែប្រួលពីការព្យាករ ៥,២% ដែលចេញដោយ ADB កាលពីខែមេសា។ ធនាគារ​អភិវឌ្ឍន៍អាស៊ីក៏បានបង្កើនការព្យាកររបស់ខ្លួនសម្រាប់អតិផរណាក្នុងតំបន់ ខណៈដែលតម្លៃម្ហូបអាហារ និង​ប្រេងឥន្ធនៈកាន់តែខ្ពស់។

តំបន់កំពុងអភិវឌ្ឍនៅអាស៊ី និងប៉ាស៊ីហ្វិកកំពុងបន្តការងើបឡើងវិញរបស់ខ្លួន​ ពីជំងឺរាតត្បាត កូវីដ១៩ នេះ​បើ​យោង​តាមរបាយការណ៍បំពេញបន្ថែម ទស្សនវិស័យអភិវឌ្ឍន៍​អាស៊ី​ សម្រាប់ឆ្នាំ ២០២២​(Asian Development Outlook (ADO) 2022 Supplement) ដែលចេញផ្សាយនៅថ្ងៃនេះ។ ប្រទេស​ជា​ច្រើនកំពុងបន្ធូរបន្ថយការរឹតបន្តឹងការធ្វើដំណើរ ដើម្បីពង្រឹងសកម្មភាពសេដ្ឋកិច្ច។ ទោះជាយ៉ាងនេះក្តី​កំណើនបានថយចុះនៅក្នុងសាធារណៈរដ្ឋប្រជាមានិតចិន ដែលជាប្រទេសមានសេដ្ឋកិច្ចធំបំផុតនៅក្នុង​តំបន់ ដោយសារតែការរំខានពីការបិទតំបន់មួយចំនួនសារជាថ្មីដោយសារកូវីដ១៩ ព្រមទាំងតម្រូវការ​សកល​ដែលចុះខ្សោយ។

លោក Albert Park ប្រធានសេដ្ឋវិទូរបស់ ADB បានមានប្រសាសន៍ថា "ផលប៉ះពាល់សេដ្ឋកិច្ច​នៃ​ជំងឺរាតត្បាតបានធ្លាក់ចុះនៅភាគច្រើននៃតំបន់អាស៊ី ប៉ុន្តែយើងនៅឆ្ងាយពីការងើបឡើងវិញពេញលេញ និងប្រកបដោយនិរន្តរភាព ។ ក្រៅពីកំណើនថយចុះនៅសាធារណៈរដ្ឋប្រជាមានិតចិន ឥទ្ធិពលនៃសង្រ្គាម​នៅក្នុងប្រទេសអ៊ុយក្រែន បានបន្ថែមសម្ពាធអតិផរណាដែលបណ្តាលឱ្យធនាគារកណ្តាលនៅជុំវិញពិភព លោកដំឡើងអត្រាការប្រាក់ជាហេតុនាំឱ្យកំណើនថយចុះ។ វាមានសារៈសំខាន់ណាស់ក្នុងការដោះស្រាយ ភាពមិនប្រាកដប្រជាជាសកលទាំងអស់នេះ ដែលបន្តបង្កហានិភ័យដល់ការងើបឡើងវិញនៃតំបន់។"

សេដ្ឋកិច្ចរបស់សាធារណៈរដ្ឋប្រជាមានិតចិន កើនបាន ៤,0% ក្នុងឆ្នាំនេះ ធៀបនឹងការព្យាករ ពីមុន ៥,0%។ ADB ក៏បានទម្លាក់ទស្សនវិស័យកំណើនរបស់ខ្លួនសម្រាប់ប្រទេសឥណ្ឌាមកត្រឹម ៧,២% ពី ៧,៥% ដោយសារមានអតិផរណាខ្ពស់ជាងការរំពឹងទុក និងការរឹតបន្តឹងរូបិយវត្ថុ។

អតិផរណានៅក្នុងតំបន់កំពុងអភិវឌ្ឍនៅអាស៊ី និងប៉ាស៊ីហ្វិក ត្រូវបានព្យាករថានឹងកើនឡើងដល់ ៤,២% នៅឆ្នាំនេះ ធៀបនឹងការព្យាករពីមុន ៣,៧%។ ទោះជាយ៉ាងណាក៏ដោយសម្ពាធ​អតិផរណា​នៅក្នុង តំបន់ទាំងមូលនៅតែទាបជាងតំបន់ផ្សេងទៀតនៅក្នុងពិភពលោក។

សម្រាប់ឆ្នាំ ២០២៣ ធនាគារអភិវឌ្ឍន៍អាស៊ីបានបន្ទាបការព្យាករកំណើនសេដ្ឋកិច្ច​របស់ខ្លួន​សម្រាប់តំបន់មកត្រឹម ៥,២% ពី ៥,៣% ខណៈដែលបង្កើនការព្យាករអតិផរណាដល់ ៣,៥% ពី ៣,១%។

ការព្យាករកំណើនសម្រាប់អនុតំបន់មួយចំនួនត្រូវបានកែប្រែ។ ទស្សនវិស័យសម្រាប់អាស៊ីអាគ្នេយ៍ ត្រូវបានដំឡើងដល់ ៥,0% នៅឆ្នាំនេះពី ៤,៩% ដោយសារមានការកើនឡើងនៃតម្រូវការក្នុងស្រុក បណ្តាលមកពីការរឹតត្បិតកូវីដ១៩ កាន់តែធូរស្រាល។ ការព្យាករសម្រាប់តំបន់ Caucasus និងអាស៊ី កណ្តាលត្រូវបានដំឡើងដល់ ៣,៨% ពី ៣,៦% ដោយសារប្រទេសមួយចំនួននៅក្នុងតំបន់អាចទប់ទល់ នឹងការធ្លាក់ចុះសេដ្ឋកិច្ចដោយសារសង្គ្រាមរវាងរុស្ស៊ីនិងអ៊ុយក្រែនបានល្អជាងការរំពឹងទុក។ នៅក្នុងតំបន់ ប៉ាស៊ីហ្វិក ការស្ទុះងើបឡើងវិញនៃវិស័យទេសចរណ៍នៅហ្វីជី បានជួយឱ្យទស្សនវិស័យកំណើននៃតំបន់ នេះមានភាពកើនឡើងដល់ ៤,៧% ពី ៣,៩% ។

ធនាគារអភិវឌ្ឍន៍អាស៊ី ប្តេជ្ញាថានឹងសម្រេចឱ្យបាននូវ វិបុលភាព បរិយាប័ន្ន ភាពធន់​និងនិរន្តរភាព ក្នុងតំបន់អាស៊ីនិងប៉ាស៊ីហ្វិក ស្របជាមួយនឹងការខិតខំប្រឹងប្រែង ដើម្បីលុបបំបាត់ភាពក្រីក្រខ្លាំង។ បង្កើត ឡើងនៅឆ្នាំ ១៩៦៦ ធនាគារនេះត្រូវបានគ្រប់គ្រងដោយសមាជិកចំនួន ៦៨ ប្រទេស ដែលក្នុងនោះមាន ៤៩ ប្រទេស មកពីតំបន់ខាងលើនេះ។

Media Contact