ອາຊີຈະຕ້ອງປັບປຸງສະພາບແວດລ້ອມດີຈິິຕັອນສຳລັບຜູ້ປະກອບການ, ດັດສະນີໂລກຊີ້ໃໝ່ໃຫ້ເຫັນ

ນະຄອນຫຼວງມະນີລາ, ຟີລິບປິນ (21 ກັນຍາ 2022) — ອີງ​ຕາມ​ດັດສະນີ​ໃໝ່​ທີ່​ພັດທະນາຂຶ້ນໂດຍທະນາຄານ​ພັດທະນາ​ອາຊີ (ADB), ສີ່​ສ່ວນ​ຫ້າ​ຂອງ​ເສດຖະກິດປະເທດໃນ​ອາຊີ​ທີ່​ກຳລັງ​ພັດທະນາ​ຢູ່​ລຸ່ມ​ສຸດຂອງການຈັດ​ລໍາ​ດັບ​ໂລກ ດ້ານ​ສະພາບ​ແວດ​ລ້ອມ​ດິຈິ​ຕັອນແລະ​ລະບົບ​ການ​ສະໜັບສະໜູນ​ຜູ້​ປະກອບ​ການ.

ປະເທດສິງກະໂປ ມີສະພາບແວດລ້ອມດີຈິຕັອນແລະລະບົບສະໜັບສະໜູນຜູ້ປະກອບການທີ່ດີທີ່ສຸດໃນໂລກ, ອີງຕາມດັດສະນີໂລກ ກ່ຽວກັບລະບົບຜູ້ປະກອບການດິຈິຕັອນ ທີ່ໄດ້ຖືກເຜີຍແຜ່ມື້ນີ້ ຊຶ່ງເປັນສ່ວນໜຶ່ງຂອງບົດລາຍງານການຄາດຄະເນການພັດທະຂອງນາອາຊີ 2022 ສະບັບປັບປຸງ. ປະເທດສະ​ຫະ​ລັດຖືກຈັດ​ເປັນ​ລໍາດັບສອງ​, ໃນ​ຂະ​ນະ​ທີ່​ປະເທດສະ​ວີ​ເດັນຖືກຈັດ​ເປັນ​ລໍາ​ດັບ​ສາມ​ໃນ​ບັນ​ດາ 113 ເສດ​ຖະ​ກິດ​ໃນ​ບັນ​ຊີ​ລາຍຊື່ປະເທດ​. ​ແຕ່ວ່າ 17 ​ໃນ​ຈຳນວນ 21 ​ເສດຖະກິດຂອງປະເທດ​ທີ່​ກຳລັງ​ພັດທະນາ​ໃນ​ອາຊີ​ທີ່​ຮວມຢູ່ໃນ​ນັ້ນ ​ໄດ້​ຖືກ​ຈັດ​ລໍາ​ດັບ​ໃນ​ລະດັບຕໍ່າ ​ເຊິ່ງ​​ເປັນການເນັ້ນ​ເຖິງ​ຄວາມຈໍາເປັນ ສຳລັບຫຼາຍໆປະເທດໃນ ບັນດາປະເທດເຫຼົ່ານັ້ນ ຈະຕ້ອງມີການ​ບຳລຸງ​ແລະສ້າງ​ຜູ້ການ​ປະກອບ​ການ​ດ້ານ​ດິຈິຕັອນ.

ໂລກແຫ່ງດີຈິຕັອນໃຫ້ໂອກາດແກ່ການເຕີບໂຕທີ່ຍິ່ງໃຫຍ່ ສໍາລັບພາກທຸລະກິດໃນຂົງເຂດອາຊີແລະປາຊີຟິກ. ມັນ​ເປັນ​ໂຕຂັບ​ເຄື່ອນ​ນະ​ວັດ​ຕະ​ກໍາ​, ຊຶ່ງ​ເປັນ​ກະແຈ​ອັນສຳຄັນ ສໍາ​ລັບ​​ເສດ​ຖະ​ກິດຂອງປະເທດທີ່ກໍາລັງພະ​ຍາ​ຍາມ​ ເພື່ອ​ບັນ​ລຸ​ສະ​ຖາ​ນະ​ພາບປະເທດທີ່ມີ​ລາຍ​ໄດ້​ສູງ​. ມັນຍັງສາມາດເຮັດໃຫ້ເສດຖະກິດຂອງປະເທດ ມີຄວາມຜ່ອນຜັນຫຼາຍຂຶ້ນ, ດັ່ງທີ່ເຫັນໄດ້ໃນເວລາທີ່ເຕັກໂນໂລຊີດິຈິຕັອນໄດ້ຊ່ວຍໃຫ້ທຸລະກິດຈໍານວນຫຼາຍລອດວິກິດຈາກການແຜ່ລະບາດຂອງພະຍາດໂຄວິດ-19, ແລະມັນສາມາດຊຸກຍູ້ການເຕີບໂຕໂດຍລວມ ດ້ວຍການຫຼຸດຜ່ອນຄ່າໃຊ້ຈ່າຍໃນການເລີ່ມຕົ້ນເຮັດທຸລະກິດ.

ທ່ານ ອາລເບີດ ພາກຄ໌, ຫົວໜ້ານັກເສດຖະສາດຂອງ ADB ໄດ້ໃຫ້ຮູ້ວ່າ “ຜູ້ປະກອບການທຸລະກິດທາງດ້ານດິຈິຕັອນ ໄດ້ຊ່ວຍໃຫ້ເສດຖະກິດຂອງປະເທດຢູ່ລອດໄດ້ໃນໄລຍະການແຜ່ລະບາດຂອງພະຍາດໂຄວິດ-19, ແລະມັນສາມາດກາຍເປັນເຄື່ອງຈັກຂັບເຄື່ອນ ການເຕີບໂຕແລະນະວັດຕະກໍາອັນສຳຄັນ ໃນສະພາບການພາຍຫຼັງການລະບາດພະຍາດ,” ທ່ານໄດ້ໃຫ້ຮູ້ຕື່ມອີກວ່າ “ເພື່ອເຮັດ​ໃຫ້​ສິ່ງ​ນີ້​ເກີດ​ຂຶ້ນໄດ້, ມັນ​ຈຳ​ເປັນ​ຕ້ອງ​ມີ​ສະ​ພາບ​ແວດ​ລ້ອມ​ສະ​ໜັບ​ສະໜູນ​ໃຫ້ສາມາດດໍາເນີນການໄດ້ ດ້ວຍ​ນະ​ໂຍ​ບາຍ​ແລະ​ແຮງ​ຈູງ​ໃຈທີ່​ເໝາະ​ສົມ. ໃນ​ຂະ​ນະ​ທີ່ ​ສະ​ພາບ​ແວດ​ລ້ອມ​ສໍາ​ລັບ​ຜູ້​ປະ​ກອບ​ການ​ດ້ານດິ​ຈິ​ຕັອນຂອງ​ອາ​ຊີ ​ໄດ້​ມີ​ຄວາມກ້າວ​ໜ້າ​ຢ່າງ​ຫຼວງ​ຫຼາຍ​ໃນ​ສອງ​ສາມ​ປີ​ທີ່​ຜ່ານ​ມາ, ແຕ່ຍັງ​ມີ​ຊ່ອງ​ຫວ່າງ​ຫຼາຍ​ສໍາ​ລັບ​ການ​ປັບ​ປຸງ.”

ດັດສະນີ ວັດແທກຄຸນນະພາບຂອງສະພາບແວດລ້ອມສໍາລັບຜູ້ປະກອບການດ້ານດິຈິຕັອນ ໂດຍເບິ່ງລະດັບຂອງຄວາມເປັນດິຈິຕັອນໃນ 8 ດ້ານຄື: ວັດທະນະທໍາ, ສະຖາບັນ, ເງື່ອນໄຂສະພາບຂອງຕະຫຼາດ, ພື້ນຖານໂຄງລ່າງ, ທຶນມະນຸດ, ຄວາມຮູ້, ການເງິນ, ແລະ ເຄືອຂ່າຍ.

ນອກຈາກການລົງທຶນໃນພື້ນຖານໂຄງລ່າງດິຈິຕັອນເຊັ່ນວ່າ ເຄືອຂ່າຍບຣອດແບນ, ລັດຖະບານຕ້ອງສົ່ງເສີມຄວາມໝັ້ນຄົງທາງດ້ານການເມືອງ, ລະບົບກົດໝາຍທີ່ເຊື່ອຖືໄດ້, ຕະຫຼາດເປີດກ້ວາງແລະມີການແຂ່ງຂັນ, ແລະສິດຄອບຄອງຊັບສິນທີ່ເຂັ້ມແຂງ. ການວິເຄາະຂອງ ADB ສະແດງໃຫ້ເຫັນວ່າ ລະບຽບກົດໝາຍທີ່ເຂັ້ມແຂງ ມີຜົນກະທົບທາງບວກຕໍ່ການປະດິດສ້າງຂອງວິສາຫະກິດ, ໃນຂະນະທີ່ ການສໍ້ລາດບັງຫຼວງມີໜ້ອຍລົງໃນສັງຄົມ ແມ່ນສຳພັນກັບການເພີ່ມຂຶ້ນຂອງຈຳນວນຜູ້ປະກອບການໃໝ່ໃນຕະຫຼາດ.

ສຳລັບຂົງເຂດອາຊີ ແລະ ປາຊີຟິກ ໂດຍລວມແລ້ວ, ວັດທະນະທຳທີ່ສະໜັບສະໜູນຍັງບໍ່ທັນພຽງພໍ ແມ່ນເປັນຈຸດອ່ອນອັນໜຶ່ງໃນບັນດາຈຸດອ່ອນທີ່ສຸດ ເມື່ອເວົ້າເຖິງການບຳລຸງແລະສ້າງຜູ້ປະກອບການດ້ານດິຈິຕັອນ. ຕົວຢ່າງໜຶ່ງແມ່ນ ການຂາດຄວາມຮັບຮູ້ຂອງມວນຊົນໃນທົ່ວສັງຄົມຕໍ່ກັບບົດບາດສໍາຄັນ ທີ່ຜູ້ປະກອບການມີບົດບາດໃນຄວາມກ້າວຫນ້າທາງດ້ານເສດຖະກິດ. ຫົນທາງໜຶ່ງທີ່ຈະປ່ຽນແປງສິ່ງນີ້ໄດ້ແມ່ນ ການຍົກສູງລະດັບຄວາມຮັບຮູ້ຂອງມວນຊົນ ກ່ຽວກັບການເປັນຜູ້ປະກອບການຜ່ານການສຶກສາ.

ADB ມີຄວາມມຸ່ງໝັ້ນເພື່ອໃຫ້ພາກພື້ນອາຊີແລະປາຊີຟິກ ຈະເລີນຮຸ່ງເຮືອງ, ທົ່ວເຖິງ, ພ້ອມຮັບກັບການປ່ຽນແປງ, ແລະ ຍືນຍົງ ໄປພ້ອມກັບ ສຸມຄວາມພະຍາຍາມຂອງຕົນ ເພື່ອຫຼຸດຜ່ອນຄວາມທຸກຍາກ. ສ້າງຕັ້ງຂຶ້ນໃນປີ 1966, ADB ມີປະເທດສະມາຊິກທັງໝົດ 68 ປະເທດ ຊຶ່ງໃນນັ້ນມີ 48 ປະເທດມາຈາກພາກພື້ນດັ່ງກ່າວ.