ນະຄອນຫຼວງມະນີລາ, ຟິລິບປິນ (29 ມິຖຸນາ 2022) — ສະພາບແວດລ້ອມໃນການດຳເນີນທຸລະກິດທີ່ດີຂຶ້ນ ໃນທົ່ວພາກພື້ນອາຊີຕາເວັນອອກສຽງໃຕ້ ແມ່ນມີຄວາມສຳຄັນຫຼາຍ ຕໍ່ການຟື້ນຄືນສູ່ສະພາບປົກກະຕິ ຂອງບັນດາວິສາຫະກິດທີ່ໄດ້ຮັບຜົນກະທົບຢ່າງໜັກໜ່ວງຈາກການແຜ່ລະບາດຂອງພະຍາດໂຄວິດ-19. ນີ້ແມ່ນຂໍ້ຄວມທີ່ສຳຄັນຈາກ ກອງປະຊຸມສຳມະນາພາກພື້ນ ກ່ຽວກັບ “ສະພາບແວດລ້ອມໃນການດຳເນີນທຸລະກິດຢູ່ທ້ອງຖິ່ນທີ່ດີຂຶ້ນ ເພື່ອການຟື້ນຕົວຈາກການແຜ່ລະບາດຂອງພະຍາດ ໃນອາຊີຕາເວັນອອກສຽງໃຕ້” ທີ່ໄດ້ຈັດຂຶ້ນທາງອອນລາຍໃນວັນທີ 29 ມິຖຸນານີ້, ຊຶ່ງມີບັນດາຜູ້ສ້າງນະໂຍບາຍຈາກທົ່ວພາກພື້ນເຂົ້າຮ່ວມ ແລະ ໄດ້ປຶກສາຫາລືກັນ ກ່ຽວກັບ ນະໂຍບາຍລະດັບຊາດ ແລະ ລະດັບທ້ອງຖິ່ນ ເພື່ອຂັບເຄື່ອນການຟື້ນຕົວຂອງເສດຖະກິດ ແລະ ສັງຄົມ.
ທ່ານ ຣາເມັດສ໌ ສຸບຣາມານຽມ, ຫົວໜ້າກົມອາຊີຕາເວັນອອກສຽງໃຕ້ຂອງທະນາຄານພັດທະນາອາຊີ (ADB) ໄດ້ໃຫ້ຮູ້ວ່າ “ວິສາຫະກິດຂະໜາດນ້ອຍ ເປັນພື້ນຖານຂອງເສດຖະກິດໃນທ້ອງຖິ່ນຂອງບັນດາປະເທດໃນພາກພື້ນອາຊີຕາເວັນອອກສຽງໃຕ້” ທ່ານຍັງໄດ້ໃຫ້ຮູ້ຕື່ມອີກວ່າ "ຄວາມເຂົ້າໃຈເຖິງສະພາບແວດລ້ອມໃນການດໍາເນີນທຸລະກິດຢູ່ຂັ້ນທ້ອງຖິ່ນ ວ່າມີຜົນກະທົບແນວໃດ ຕໍ່ຄວາມຢູ່ລອດແລະສາມາດເຕີບໂຕຕໍ່ໄປໄດ້ຂອງບັນດາວິສາຫະກິດ ໃນໄລຍະທີ່ພວມປະເຊີນກັບສິ່ງທ້າທາຍ ແມ່ນກຸນແຈສູ່ການປົດລັອກການແຊກແຊງທາງດ້ານນະໂຍບາຍທີ່ສະໜັບສະໜູນການຟື້ນຕົວ ພາຍຫລັງການແຜ່ລະບາດຂອງພະຍາດ ແລະ ສາມາດຊ່ວຍໃຫ້ມີທ່າກ້າວໃນການບັນລຸເປົ້າໝາຍການພັດທະນາແບບຍືນຍົງ”.
ການເຕີບໂຕທາງດ້ານເສດຖະກິດພາກພື້ນ ແມ່ນສຳຄັນຫຼາຍ ຕໍ່ກັບການພັດທະນາຢ່າງຕໍ່ເນື່ອງຂອງພາກພື້ນອາຊີຕາເວັນອອກສຽງໃຕ້. ເສດຖະກິດທ້ອງຖິ່ນຂອງບັນດາປະເທດຕ່າງໆໃນພາກພື້ນ ສ່ວນໃຫຍ່ແມ່ນຄອບງຳໂດຍ ຈຸນລະວິສາຫະກິດ ວິສາຫະກິດຂະໜາດນ້ອຍ ແລະ ຂະຫນາດກາງ ເຊິ່ງກວມເອົາ 97% ຂອງຈໍານວນວິສາຫະກິດທັງຫມົດໃນພາກພື້ນ, ຈ້າງງານປະມານສອງສ່ວນສາມຂອງກໍາລັງແຮງງານທັງໝົດ ແລະ ກວມເອົາປະມານ 40% ຂອງຜະລິດຕະພັນລວມພາຍໃນປະເທດ. ມັນຕ່າງຈາກວິສະຫະກິດຂະໜາດໃຫຍ່ທີ່ໂດຍທົ່ວໄປແລ້ວແມ່ນຕັ້ງຢູ່ໃນເຂດໃຈກາງຕົວເມືອງ, 80% ຂອງຈໍານວນ ຈຸນລະວິສາຫະກິດ ວິສາຫະກິດຂະໜາດນ້ອຍ ແລະ ຂະໜາດກາງ ທັງໝົດ ແມ່ນຢາຍຢູ່ຕາມເມືອງຕ່າງໆຂອງແຂວງ ຫຼື ຢູ່ຕາມເຂດຊົນນະບົດ ແລະ ເຂດຫ່າງໄກສອກຫຼີກ ເຊິ່ງບັນດາວິສາຫະກິດເຫຼົ່ານີ້ ແຈກຈ່າຍສິນຄ້າແລະການບໍລິການທີ່ຈຳເປັນຫຼາກຫຼາຍໃຫ້ແກ່ຊຸມຊົນໃນບັນດາທ້ອງຖິ່ນດັ່ງກ່າວ, ຊຶ່ງເປັນການສະໜອງວຽກເຮັດງານທຳ ໂດຍສະເພາະ ໃຫ້ແກ່ແມ່ຍິງ.
ເຖິງຢ່າງໃດກໍ່ຕາມ, ບັນດາຈຸນລະວິສາຫະກິດ ວິສາຫະກິດຂະໜາດນ້ອຍ ແລະ ຂະຫນາດກາງ ປະເຊີນກັບສິ່ງທ້າທາຍທີ່ເປັນອັນສະເພາະ. ບັນດາວິສາຫະກິດເຫຼົ່ານີ້ ມີລະດັບຕົ້ນທຶນຕ່ຳ ແລະ ມີຊັບພະຍາກອນທີ່ຈຳກັດໃນການປະດິດຄິດສ້າງ. ຫຼາຍວິສາຫະກິດແມ່ນນອນຢູ່ນອກລະບົບ ປະກອບກັບ ມີຄວາມຮູ້ໃນລະດັບຕໍ່າ ກ່ຽວກັບ ການສະໜັບສະໜູນແລະໂຄງການຂອງລັດຖະບານ. ໃນທົ່ວພາກພື້ນອາຊີຕາເວັນອອກສຽງໃຕ້, ຈຸນລະວິສາຫະກິດ ວິສາຫະກິດຂະໜາດນ້ອຍ ແລະ ຂະຫນາດກາງ ໄດ້ປະສົບກັບການສູນເສຍທາງດ້ານລາຍຮັບແລະທຶນຢ່າງຫຼວງຫຼາຍ ອັນເນື່ອງມາຈາກການລະບາດຂອງພະຍາດໂຄວິດ-19. ຈຸນລະວິສາຫະກິດ ວິສາຫະກິດຂະໜາດນ້ອຍ ແລະ ຂະຫນາດກາງ ຍັງປະເຊີນກັບສິ່ງທ້າທາຍອັນໃໝ່ເຊັ່ນ: ຄ່າໃຊ້ຈ່າຍໃນການດຳເນີນທຸລະກິດທີ່ສູງຂຶ້ນ ການເພີ່ມຂຶ້ນຂອງໜີ້ສິນ ແລະ ຄວາມບໍ່ແນ່ນອນດ້ານກົດ ແລະ ລະບຽບການ ຊຶ່ງມັນຮຽກຮ້ອງໃຫ້ມີການປະຕິຮູບທາງດ້ານໂຄງສ້າງ ເພື່ອປັບປຸງສະພາບແວດລ້ອມໃຫ້ເອື້ອອໍານວຍແກ່ການດໍາເນີນທຸລະກິດຢູ່ທ້ອງຖິ່ນ.
ເນື່ອງຈາກທຸລະກິດຂະໜາດນ້ອຍ ແມ່ນຜູ້ປະກອບສ່ວນສໍາຄັນ ຕໍ່ຜົນສໍາເລັດທາງດ້ານເສດຖະກິດ, ແຜນການຟື້ນຟູເສດຖະກິດ ຫຼື ຄວາມພະຍາຍາມທີ່ຈະຫັນໄປສູ່ເສດຖະກິດທີ່ມີຄາບອນຕໍ່າ ຈະຕ້ອງມີການສ້າງແຜນເງື່ອນໄຂທຸລະກິດລະດັບທ້ອງຖິ່ນໃນທຸກປະເທດ ເພື່ອເຂົ້າໃຈບັນດາ ປັດໃຈ ຍຸດທະສາດ ແລະ ພຶດຕິກໍາທີ່ສໍາຄັນ ທີ່ສາມາດສ້າງຄວາມເຂັ້ມແຂງໃຫ້ແກ່ບັນດາຈຸນລະວິສາຫະກິດ ວິສາຫະກິດຂະໜາດນ້ອຍ ແລະ ຂະຫນາດກາງ ແລະ ຊຸກຍູ້ການຂະຫຍາຍຕົວຂອງເສດຖະກິດ ທ້ອງຖິ່ນ.
ກອງປະຊຸມສຳມະນາພາກພື້ນຄັ້ງນີ້ ໄດ້ປຶກສາຫາລື ກ່ຽວກັບ ການຕອບສະໜອງທາງດ້ານນະໂຍບາຍຂອງລັດຖະບານອັນພົ້ນເດັ່ນ ລວມທັງ ຄວາມຕ້ອງການເຖິງ ວິທີການພິຈາລະນາໂດຍລວມເອົາປັດໃຈຕ່າງໆປະສົມປະສານເຂົ້າກັນ ເຊິ່ງສາມາດນໍາເອົາຫຼາຍພາກສ່ວນຮັບຜິດຊອບໜ້າທີ່ແຕກຕ່າງກັນ ເພື່ອການສ້າງເສດຖະກິດທ້ອງຖິ່ນໃຫ້ຈະເລີນຮຸ່ງເຮືອງ ດ້ວຍວິສາຫະກິດຂະຫນາດນ້ອຍ ແລະ ຄວາມເປັນຜູ້ປະກອບການທີ່ເຕັມໄປດ້ວຍພະລັງ. ພາຍຫຼັງການແຜ່ລະບາດຂອງພະຍາດໂຄວິດ-19, ການສົ່ງເສີມແນວຮ່ວມໃຫ້ເຂັ້ມແຂງຂື້ນ ຜ່ານການແລກປ່ຽນຂໍ້ມູນຂ່າວສານໃຫ້ໄດ້ຫຼາຍຂຶ້ນ ການປຶກສາຫາລືດ້ານນະໂຍບາຍ ແລະ ການໃຫ້ຄໍາປຶກສາແກ່ທຸລະກິດຂະຫນາດນ້ອຍ ແມ່ນຈໍາເປັນ ເພື່ອສ້າງໃຫ້ ຈຸນລະວິສາຫະກິດ ວິສາຫະກິດຂະໜາດນ້ອຍ ແລະ ຂະຫນາດກາງ ມີຄວາມສາມາດໃນການແຂ່ງຂັນແລະຜະລິດໄດ້ຫຼາຍຂຶ້ນ. ກອງປະຊຸມສຳມະນາຄັ້ງນີ້ ຈັດຂຶ້ນໂດຍ ADB ໂດຍໄດ້ຮັບທຶນສະໜັບສະໜູນຈາກ ກອງທຶນຫຼຸດຜ່ອນຄວາມທຸກຍາກແລະການຮ່ວມມືພາກພື້ນຂອງສາທາລະນະລັດປະຊາຊົນຈີນ.
ADB ມຸ່ງໝັ້ນເພື່ອໃຫ້ພາກພື້ນອາຊີແລະປາຊີຟິກ ຈະເລີນຮຸ່ງເຮືອງ, ທົ່ວເຖິງ, ພ້ອມຮັບກັບການປ່ຽນແປງ, ແລະ ຍືນຍົງ ໄປພ້ອມກັບສຸມຄວາມພະຍາຍາມຂອງຕົນເພື່ອຫຼຸດຜ່ອນຄວາມທຸກຍາກ. ສ້າງຕັ້ງຂຶ້ນໃນປີ 1966, ADB ມີປະເທດສະມາຊິກທັງໝົດ 68 ປະເທດ ຊຶ່ງໃນນັ້ນມີ 49 ປະເທດມາຈາກພາກພື້ນດັ່ງກ່າວ.
