ນະຄອນຫລວງວຽງຈັນ, ສາທາລະນະລັດ ປະຊາທິປະໄຕ ປະຊາຊົນລາວ (14 ທັນວາ 2022) — ທະນາຄານພັດທະນາອາຊີ (ADB) ຍັງຄົງຮັກສາການຄາດຄະເນການເຕີບໂຕທາງດ້ານເສດຖະກິດ ຂອງສາທາລະນະລັດ ປະຊາທິປະໄຕ ປະຊາຊົນລາວ (ສປປ ລາວ), ໃນຂະນະທີ່ການຄາດຄະເນ ອັດຕາເງິນເຟີ້ ທີ່ສູງຂຶ້ນ, ອີງຕາມບົດລາຍງານເພີ້ມເຕີ້ມຂອງ ການຄາດຄະເນການພັດທະນາໃນອາຊີ (ADO) 2022 ທີ່ອອກມາໃນມື້ນີ້.
ADB ກ່າວໃນບົດລາຍງານວ່າ ອັດຕາເງິນເຟີ້ ຍັງສືບຕໍ່ເພີ່ມຂຶ້ນໃນເສດຖະກິດທົ່ວເອເຊຍ ແລະ ປາຊີຟິກ ຈາກລາຄາພະລັງງານ ແລະ ສະບຽງອາຫານທີ່ສູງ, ຕົ້ນຕໍແມ່ນມາຈາກຜົນກະທົບຂອງການຮຸກຮານຂອງຣັດເຊຍຕໍ່ຢູເຄຣນ. ໃນຂະນະທີ່ລາຄານ້ໍາມັນ, ອາຍແກັສ, ແລະ ອາຫານໃນທົ່ວໂລກ ໄດ້ຫຼຸດລົງຈາກຈຸດສູງສຸດຂອງພວກເຂົາໃນຕົ້ນປີ, ແຕ່ລາຄາຍັງຄົງສູງກວ່າກ່ອນ ທີ່ມີການຣຸກຮານ. ບົດລາຍງານ ຄາດຄະເນວ່າ ອັດຕາເງິນເຟີ້ໃນ ສປປ ລາວ ຈະຢູ່ໃນລະດັບສະເລ່ຍ 23% ໃນປີ 2022 ກ່ອນທີ່ຈະຫຼຸດລົງເປັນ 10% ໃນປີ 2023.
"ຄວາມກົດດັນຂອງອັດຕາເງິນເຟີ້ ຄາດວ່າຈະສືບຕໍ່ໃນໄລຍະສັ້ນ, ຈາກນະໂຍບາຍເຄັ່ງຄັດຂອງທະນາຄານກາງ ໃນທົ່ວໂລກ ໃນສະພາບການອ່ອນຄ່າຂອງສະກຸນເງິນທ້ອງຖິ່ນ," ຜູ້ຕ່າງໜ້າ ADB ປະຈໍາ ສປປ ລາວ ທ່ານ Sonomi Tanaka ກ່າວ. "ມັນມີຄວາມສໍາຄັນ ທີ່ໃຫ້ມີຄວາມພະຍາຍາມປະສານງານ ໃນການແກ້ໄຂຜົນກະທົບຈາກການອ່ອນຄາຂອງເງິນຕາ ຕໍ່ອັດຕາເງິນເຟີ້ ພາຍໃນປະເທດ - ໂດຍສະເພາະ ແມ່ນຕໍ່ລາຄາອາຫານ ແລະ ນໍ້າມັນເຊື້ອໄຟ - ເນື່ອງຈາກການເຫນັງຕີງຂອງລາຄາສິນຄ້າເຫຼົ່ານີ້ ສ້າງຜົນກະທົບຕໍ່ຜູ້ທຸກຍາກ ແລະ ຜູ້ມີຄວາມສ່ຽງທີ່ບໍ່ສະເໝີພາບກັນ."
ກໍລະນີສຶກສາໃໝ່ຂອງ ADB ທີ່ນຳອອກເຜີຍແຜ່ໃນມື້ນີ້, ການພັດທະນາຕະຫຼາດພັນທະບັດລັດຖະບານ ສະກຸນເງິນທ້ອງຖິ່ນ ໃນຕະຫຼາດທີ່ເກີດໃໝ່ ໃນພາວະໂລກລະບາດໂຄວິດ-19, ໄດ້ຍົກໃຫ້ເຫັນເຖິງວິທີການພັດທະນາຕະຫຼາດ ພັນທະບັດລັດຖະບານ ສະກຸນເງິນທ້ອງຖິ່ນໃນ ສປປ ລາວ ສາມາດຊ່ວຍເພີ່ມຄວາມເຂັ້ມແຂງໃຫ້ແກ່ການຟື້ນຟູເສດຖະກິດ ແລະ ສ້າງຄວາມຢືດຢຸ່ນຕໍ່ການປ່ຽນແປງແຮງໃນອະນາຄົດ.
"ການລົງເລິກຕະຫຼາດການເງິນພາຍໃນ ໂດຍສະເພາະພັນທະບັດລັດຖະບານສະກຸນເງິນທ້ອງຖິ່ນ, ໃຫ້ຜົນປະໂຫຍດທີ່ຫຼາກຫຼາຍ ລວມທັງການຍົກສູງຄວາມອາດສາມາດຂອງເສດຖະກິດ ທີ່ຈະຕອບສະຫນອງຕໍ່ການປ່ຽນແປງແຮງ ແລະ ສະຫນອງແຫຼ່ງທຶນທີ່ຫມັ້ນຄົງໃຫ້ແກ່ລັດຖະບານ ໃນລາຄາທີ່ເຫມາະສົມ ແລະ ອາຍຸພັນທະບັດຕາມຄວາມຕ້ອງການ," ຄຳກ່າວຂອງທີ່ປຶກສາຂອງ ADB ຈາກກົມຄົ້ນຄ້ວາເສດຖະກິດ ແລະ ການຮ່ວມມືພາກພື້ນ ສາໂຕລຸ ຢາມາດິຣາ. "ເສດຖະກິດເຫຼົ່ານັ້ນທີ່ມີຄວາມຄືບຫນ້າໃນການລົງເລິກຕະຫຼາດເງິນຕາທ້ອງຖິ່ນຂອງຕົນ ແມ່ນໄດ້ຮັບການປ້ອງກັນຫລາຍກວ່າ ຈາກການປ່ຽນແປງກະທັນຫັນຂອງເງິນຕາ."
ໝູນໃຊ້ປະສົບການຈາກການລິເລີ່ມຕະຫຼາດພັນທະບັດອາຊີ, ກໍລະນີສຶກສາ ໄດ້ວາງມາດຕະການໄລຍະສັ້ນ ແລະ ກາງ ທີ່ສາມາດຊ່ວຍປັບປຸງປະສິດທິພາບຂອງຕະຫຼາດພັນທະບັດລັດຖະບານ, ລວມທັງການຄຸ້ມຄອງກະແສເງິນສົດຂອງລັດຖະບານ ແລະ ໜີ້ສິນສາທາລະນະຢ່າງມີປະສິດທິພາບ.
ADB ມີຄວາມມຸ່ງໝັ້ນທີ່ຈະບັນລຸເຮັດໃຫ້ພາກພື້ນອາຊີແລະປາຊີຟິກມີຄວາມຈະເລີນຮຸ່ງເຮືອງ ທົ່ວເຖິງ ພ້ອມຮັບກັບການປ່ຽນແປງ ແລະ ຍືນຍົງ ໄປພ້ອມກັບການຮັກສາຄວາມພະຍາຍາມຂອງຕົນໃນການລົບລ້າງຄວາມທຸກຍາກ. ສ້າງຕັ້ງຂຶ້ນໃນປີ 1966, ADB ມີສະມາຊິກ 68 ປະເທດ ໃນນັ້ນມີ 49 ປະເທດມາຈາກພາກພື້ນດັ່ງກ່າວ.
