ນະຄອນຫຼວງມະນີລາ, ຟີລິບປິນ (25 ເມສາ 2022) — ໃນປີ 2021, ທະນາຄານພັດທະນາອາຊີ (ADB) ໄດ້ໃຫ້ຄຳໝັ້ນສັນຍາສຳລັບວົງເງິນ 22,8 ຕື້ໂດລາສະຫະລັດ ຈາກແຫຼ່ງທຶນຂອງຕົນ ເພື່ອຊ່ວຍພາກພື້ນອາຊີແລະປາຊີຟິກ ແກ້ໄຂຜົນກະທົບໂດຍກົງຈາກການແຜ່ລະບາດຂອງພະຍາດອັກເສບປອດຈາກເຊື້ອຈຸນລະໂລກສາຍພັນໃໝ່ (ໂຄວິດ-19) ແລະ ສົ່ງເສີມການຟື້ນຟູຕາມທິດສີຂຽວ.
ຜົນໄດ້ຮັບທາງດ້ານການເງິນ ແລະ ການດໍາເນີນງານໄດ້ຖືກເຜີຍແຜ່ໃນ ບົດລາຍງານປະຈໍາປີ 2021 ຂອງ ADB ໃນມື້ນີ້. ບົດລາຍງານໄດ້ສະຫຼຸບໃຫ້ເຫັນເຖິງວ່າ ADB ໄດ້ສະໜັບສະໜູນບັນດາປະເທດສະມາຊິກທີ່ກໍາລັງພັດທະນາ ຜ່ານການປະສົມປະສານທາງດ້ານ ການເງິນ, ຄວາມຮູ້, ແລະ ການຮ່ວມມື ແນວໃດ.
ທ່ານ ມາສະສຸກຸ ອາສະກະວາ, ປະທານ ADB ໄດ້ໃຫ້ຮູ້ວ່າ “ADB ເຊື່ອໝັ້ນຢ່າງໜັກແໜ້ນວ່າ ການແກ້ໄຂຜົນກະທົບຈາກການລະບາດຂອງພະຍາດ ແລະ ການສະໜັບສະໜູນການພັດທະນາໃນໄລຍະຍາວ ບໍ່ຜູກຂາດເຊິ່ງກັນແລະກັນ”, ທ່ານໄດ້ໃຫ້ຮູ້ຕື່ມອີກວ່າ "ການຕອບໂຕ້ ໂຄວິດ-19 ແບບຍືນຍົງຂອງພວກເຮົາ ໄດ້ວາງພື້ນຖານເພື່ອການຟື້ນຟູຢ່າງທົ່ວເຖິງ, ພ້ອມຮັບກັບການປ່ຽນແປງ, ແລະ ຕາມທິດສີຂຽວ ເພື່ອຮັບປະກັນບາດກ້າວໄປສູ່ການບັນລຸເປົ້າໝາຍຍຸດທະສາດ 2030 ຂອງພວກເຮົາ”.
ວົງເງິນມູນຄ່າ 22,8 ຕື້ໂດລາສະຫະລັດທີ່ໄດ້ໃຫ້ສັນຍາໃນປີ 2021 ລວມມີ ເງິນກູ້ແລະການຄໍ້າປະກັນ ທືນຊ່ວຍເຫຼືອລ້າການລົງທຶນໃນຫຸ້ນສ່ວນ, ແລະການຊ່ວຍເຫຼືອທາງດ້ານວິຊາການ ທີ່ສະຫນອງໃຫ້ກັບພາກລັດຖະບານ ແລະ ພາກເອກະຊົນ. ນອກນີ້, ADB ຍັງລະດົມໄດ້ທຶນມູນຄ່າ 12,9 ຕື້ໂດລາສະຫະລັດ ຈາກການຮ່ວມທຶນ.
ໃນຄໍາໝັ້ນສັນຍາຂອງ ADB ໃນປີ 2021, ວົງເງິນມູນຄ່າ 13,5 ຕື້ໂດລາສະຫະລັດ ຫຼື 59% ແມ່ນສໍາລັບການຕອບໂຕ້ການລະບາດຂອງພະຍາດ. ເຖິງແມ່ນວ່າ, ຫຼາຍໆຄຳໝັ້ນສັນຍາໃນບັນດາຄໍາໝັ້ນສັນຍາເຫຼົ່ານີ້ ເຊັ່ນວ່າ: ການສ້າງຄວາມເຂັ້ມແຂງໃຫ້ແກ່ຂະແໜງສາທາລະນະສຸກ ພາຍຫລັງການລະບາດພະຍາດໄດ້ສິ້ນສຸດລົງ ກໍ່ຍັງຄົງຈະໃຫ້ການຊ່ວຍເຫຼືອແກ່ພາກພື້ນສືບຕໍ່ໄປ.
ການສະໜັບສະໜູນຂອງ ADB ເພື່ອການຕອບໂຕ້ການລະບາດຂອງພະຍາດ ລວມມີທືນມູນຄ່າ 4,9 ຕື້ໂດລາສະຫະລັດ ທີ່ເບີກຈ່າຍດ່ວນໃຫ້ແກ່ລັດຖະບານບັນດາປະເທດຕ່າງໆ ເພື່ອສະໜັບສະໜູນການປະຕິຮູບໂຄງສ້າງ ແລະ ແກ້ໄຂຄວາມຍືນຍົງຂອງໜີ້ສິນ. ເງິນທຶນດັ່ງກ່າວລວມມີ 4,6 ຕື້ໂດລາສະຫະລັດ ເພື່ອການໃຫ້ກູ້ຕາມນະໂຍບາຍ ແລະ 250 ລ້ານໂດລາສະຫະລັດ ຜ່ານທາງເລືອກການຕອບໂຕ້ການລະບາດຂອງພະຍາດໂຄວິດ-19.
ເປັນສ່ວນຫນຶ່ງຂອງການຕອບໂຕ້ການລະບາດຂອງພະຍາດ, ADB ໃຫ້ຄໍາໝັ້ນສັນຍາໃນວົງເງິນມູນຄ່າ 4,1 ຕື້ໂດລາສະຫະລັດ ເພື່ອໃຫ້ສາມາດຈັດຊື້ແລະຈັດສົ່ງວັກຊີນທີ່ປອດໄພ ແລະ ມີປະສິດທິພາບໃຫ້ແກ່ປະເທດສະມາຊິກທີ່ກຳລັງພັດທະນາຂອງຕົນ. ADB ຍັງໄດ້ສະໜອງເງິນທຶນໃຫ້ກັບພາກເອກະຊົນມູນຄ່າ 3,3 ຕື້ໂດລາສະຫະລັດ ເພື່ອເຮັດໃຫ້ພາກທຸລະກິດສາມາດສືບຕໍ່ເປີດກິດຈະການ, ການຄ້າທີ່ຕໍ່ເນື່ອງ, ແລະເຮັດໃຫ້ຜະລິດຕະພັນແລະການບໍລິການທາງດ້ານການແພດ ມີພ້ອມຕອບສະໜອງ. ການຊ່ວຍສະໜັບສະໜູນດ້ານຄວາມຮູ້ທີ່ກວ້າງຂວາງ ໄດ້ເປັນທິດໃຫ້ແກ່ບັນດາແຜນການຮັບມືກັບພະຍາດໂຄວິດ-19 ແລະ ແຜນການຟື້ນຟູ.
ການແກ້ໄຂສິ່ງທ້າທາຍໃນການພັດທະນາໃນໄລຍະຍາວ ດັ່ງເຊັ່ນວ່າ ການປ່ຽນແປງດິນຟ້າອາກາດ ຍັງແມ່ນຈຸດສຸມທີ່ສຳຄັນໃນການດຳເນີນງານຂອງ ADB ໃນປີ 2021.
ທ່ານ ອາສະກະວາ ໄດ້ໃຫ້ຮູ້ຕື່ມອີກວ່າ “ການຕໍ່ສູ້ຕ້ານການປ່ຽນແປງດິນຟ້າອາກາດ ຈະໄດ້ຮັບໄຊຊະນະ ຫຼື ສູນເສຍ ຢູ່ໃນພາກພື້ນອາຊີແລະປາຊີຟິກ. ເພື່ອໃຫ້ປະສົບຜົນສໍາເລັດ, ພາກພື້ນຂອງພວກເຮົາ ຈໍາເປັນຕ້ອງເລັ່ງການຫັນປ່ຽນໄປສູ່ອະນາຄົດທີ່ມີຄາບອນຕ່ໍ່າ,”
ເພື່ອຊ່ວຍຕອບສະໜອງຕາມຄວາມມຸ່ງມາດປາດຖະໜາໃໝ່ຂອງການສະໜອງທຶນດ້ານດິນຟ້າອາກາດ ໃນວົງເງິນສະສົມມູນຄ່າ 100 ຕື້ໂດລາສະຫະລັດ ຈົນຮອດປີ 2030, ADB ໄດ້ປະກາດຂໍ້ລິເລີ່ມທາງດ້ານການເງິນຫຼາຍຢ່າງ ເພື່ອຊຸກຍູ້ການພັດທະນາຄາບອນຕ່ຳຂອງພາກພື້ນ. ຕົວຢ່າງເຊັ່ນ: ADB ໄດ້ເປີດໂຕກົນໄກການຫັນປ່ຽນພະລັງງານທີ່ກະຕຸ້ນການລົງທຶນຂອງເອກະຊົນແລະພາກລັດ ເພື່ອສະຫນອງເງິນທຶນ ເພື່ອຈະຍົກເລີກການນໍາໃຊ້ຊັບສິນພະລັງງານຖ່ານຫີນໄດ້ໄວຂຶ້ນ, ເພີ່ມຂະຫຍາຍທາງອອກທາງດ້ານພະລັງງານສະອາດແລະໜູນວຽນ, ແລະຮັບປະກັນການຫັນປ່ຽນແມ່ນທັນການ ແລະ ໃນລາຄາທີ່ສາມາດຮັບໄດ້.
ຄຳໝັ້ນສັນຍາທັງໝົດຂອງ ADB ໃນປີ 2021 ລວມມີ ອົງປະກອບທີ່ຈະໃຫ້ຜົນປະໂຫຍດ ໂດຍສະເພາະແກ່ແມ່ຍິງແລະເດັກຍິງ. ADB ຍັງເລັ່ງລັດການເພີ່ມທະວີຄວາມພະຍາຍາມ ເພື່ອຊ່ວຍລັດຖະບານໃນການລະດົມແຫຼ່ງທຶນຈາກພາຍໃນປະເທດທີ່ຈໍາເປັນ ເພື່ອການເຕີບໂຕແບບຍືນຍົງ, ໃນນັ້ນມີການເປີດໂຕຈຸດສູນກາງພາສີອາກອນອາຊີປາຊີຟິກ ຊຶ່ງເປັນພາຫະນະເພື່ອສະໜັບສະໜູນການປະຕິຮູບພາສີ ແລະ ການປະຕິຮູບທີ່ກ່ຽວຂ້ອງໃນທົ່ວພາກພື້ນ.
ຈົນເຖິງປະຈຸບັນ, ຄໍາໝັ້ນສັນຍາຂອງ ADB ໃນປີ 2021 ໄດ້ຮັບການສະໜອງທຶນຈາກໂຄງການກູ້ຢືມຂະໜາດໃຫຍ່ອັນດັບສອງຂອງຕົນ, ເຊິ່ງລະດົມທຶນໄດ້ມູນຄ່າ 35,8 ຕື້ໂດລາສະຫະລັດ ຜ່ານຕະຫຼາດທຶນ. ADB ໄດ້ຂາຍພັນທະບັດຕາມຫົວຂໍ້ ເປັນສະຖິຕິ ໃນປີກາຍນີ້ ແລະ ໄດ້ອອກພັນທະບັດການສຶກສາ ແລະ ພັນທະບັດສີຟ້າ ເພື່ອສຸຂະພາບຂອງມະຫາສະມຸດ ເປັນຄັ້ງທຳອິດ
ບົດລາຍງານປະຈຳປີ ຍັງໃຫ້ລາຍລະອຽດກ່ຽວກັບ ການປະຕິຮູບພາຍໃນທີ່ພວມດຳເນີນໄປ ເພື່ອຮັບປະກັນໃຫ້ ADB ມີທັກສະຄວາມສາມາດ ວັດທະນະທຳ ໂຄງສ້າງ ແລະເຄື່ອງມືທີ່ເໝາະສົມ ເພື່ອປະຕິບັດພາລະກິດຂອງຕົນ.
ບົດລາຍງານປະຈຳປີ 2021 ຂອງ ADB ແມ່ນມາໃນຮູບດີຈິຕັອນຢ່າງເຕັມຮູບແບບ ແລະ ຍັງຕອບສະໜອງໃນຮູບແບບດິຈິຕັອນທີ່ເປັນມິດກັບມືຖືທີ່ມີເນື້ອຫາຜ່ານສື່ໃນຫຼາກຫຼາຍຮູບແບບ. ເບິ່ງ www.adb.org/ar2021/digital
ADB ມຸ່ງໝັ້ນທີ່ຈະບັນລຸໃຫ້ ພາກພື້ນອາຊີແລະປາຊີຟິກ ຈະເລີນຮຸ່ງເຮືອງ ທົ່ວເຖິງ ພ້ອມຮັບກັບການປ່ຽນແປງ ແລະຍືນຍົງ ໄປພ້ອມກັບການຮັກສາຄວາມພະຍາຍາມຂອງຕົນ ເພື່ອລົບລ້າງຄວາມທຸກຍາກ. ສ້າງຕັ້ງຂຶ້ນໃນປີ 1966, ADB ມີ 68 ປະເທດສະມາຊິກ ໃນນັ້ນມີ 49 ປະເທດທີ່ມາຈາກພາກພື້ນດັ່ງກ່າວ.
