ADB NIAN SUBVENSAUN AJUDA GARANTIA SEGURANSA ALIMENTAR IHA TIMOR-LESTE DURANTE COVID-19

News Release | 22 June 2020

MANILA, FILIPINA (22 Junhu 2020) — Banku Dezenvolvimentu Asiátiku (ADB) aprova ona subvensaun milliaun $1 hodi apoiu Governu Timor-Leste hodi responde ba pandemia moras coronavirus (COVID-19), inklui fornese asistensia alimentar urjenti ba familia vulneravel. Subvensaun ne’e sei finansia husi Governu Japão nian Fundu Resposta ba Dezastre Asia Pasífiku.

Subvensaun ne’e sei hodi sosa no fahe ai-han husi loja lokal sira no agrikultor sira labele fa’an sira nia produtus tanba restrisaun emerjensia ne’ebé mak aplika hodi hapara propagasaun virus. Nune’e mos sei ajuda governu responde ba inseguransa alimentar iha ne’ebé afeita 75% populasaun no nutrisaun menus, ne’ebé afeita 50% labarik ho idade tinan 5 mai kraik. Situasaun ne’e pior liu tan durante pandemia, tanba kiak no vulneravel sira lakon rendimentu no menus asesu ba ai-han. Transportasaun sasan husi rai liur ne’ebé demora hamenus ona fos importasaun no afeita ba sirkulasaun ai-han iha rai laran.

“ADB nafatin iha kometimentu fo apoiu Timor-Leste iha luta kontrola COVID-19,” hateten Estefania Dina, Espesialista Senior Rekursus Natural no Agrukultura, ADB. “Subvensaun ne’e sei ajuda prevene nutrisaun menus ba labarik sira no garantia seguransa ai-han no nutrisaun ba uma kain vulneravel sira iha Timor-Leste, aumenta sira nian sistema imunidade, no hapara propagasaun COVID-19. Nune’e mos sei hadia ekonomiku mikro nomos emprezas lokal kiik sira.”

To’o 19 Junhu, Timor-Leste rejista ona kazu konfirmadu COVID-19 hamutuk 24 maibe laiha ema mate. Governu deklara ona estadu emerjensia iha fulan Marsu no estende to’o 26 Junhu. Ho sistema saúde ne’ebé limitadu no nivel kiak no inseguransa alimentar ne’ebé a’as, nasaun ne’e mantein vulneravel- aumenta tan ho situasaun inundasaun foin lalais ne’e.

Subvensaun foun ne’e hanesan kontinuasaun husi ADB nian asistensia COVID-19 ba Timor-Leste foin lalais ne’e, inklui apoiu sosa ekipamentu médikus liu husi asistensia teknika $1.3 milliaun, Apoiu Rejional hodi Responde ba Surtu Novel Coronavírus.

Iha 13 Abril, ADB anunsia ona pakote $20 billoens hodi responde ba nesesidades imediata ba ninia nasaun membru sira hodi responde ba pandemia COVID-19. ADB mos aprova ona medidas atu optimiza ninia operasaun hodi haruka asistensia lalais no flexível. Visita ADB nia website hodi hatene liu tan ninia servisu ne’ebé lao dadaun.

ADB iha kometimentu atu alkansa Rejiaun Ázia no Pasífiku ne’ebé prósperu, inkluzivu, reziliente, no sustentavel, no iha tempu hanesan bele sustenta esforsu hodi halakon ki’ak. Estabelese iha 1966, ho nasaun membru hamutuk 68-nasaun 49 mak mai husi rejiaun ne’e.